5 долоо хоногийн өмнө
VERTIGO АНХНЫ ХОШОЙ АВАРГА БОЛЖ, LACOSTE ШАГНАЛЫН ТАВЦАНД ГАРЛАА
Дөрвөн дугаар дараалан дөрвөн өөр аварга тодорсон Quiz League-ийн I улиралд анхны хошой ялагч төрлөө. Аравдугаар сарын 7-нд Баянгол ресторанд болсон V дугаарт 35 баг өрсөлдөж, Vertigo 26 оноогоор түрүүлэв. II дугаарын аваргууд ийнхүү дахин ялалт байгуулж, улирлын тэргүүллээ бататгалаа.
Тэргүүн байрын өрсөлдөөн сүүлийн үе хүртэл үргэлжилсэн юм. Эхний таван үеийн дараа Vertigo 20, Lacoste 19 оноотой, ердөө нэг онооны зөрүүтэй байв. Шийдвэрлэх зургаадугаар үед Vertigo бүтэн зургаан оноо авсан бол Lacoste хоёр оноо нэмснээр аваргын хувь заяа шийдэгдлээ. Lacoste 23 оноогоор дэд байр, Mrs Julia 22 оноогоор гутгаар байр эзлэв.
Lacoste-ийн хувьд энэ нь ердөө хоёр дахь удаагийн Quiz League-т оролцсон тохиолдол байв. Өмнөх дугаарт 19 оноогоор аравдугаар байр эзэлсэн тус баг энэ удаа оноогоо дөрвөөр ахиулж, шууд шагналын тавцанд гарсан нь онцлох амжилт болов. Улмаар улирлын хүснэгтэд 12 байр ахиж, 18-р байрт орж ирлээ.
Харин улирлыг тэргүүлж явсан, III дугаарын аварга АСА-гийн хувьд хүнд үдэш байв. Эхний таван үеэс 13 оноо цуглуулсан ч сүүлийн үед дөрвөн оноо алдаж, нийт 9 оноогоор 29-р байр эзэллээ. Энэ үр дүнгээр улирлын өрсөлдөөний дөрөвдүгээр байрнаас долоодугаар байр руу ухарч, тэргүүлэгчээс 22 онооны зайд үлдэв.
Энэ удаа Contenders-ийн хүрээг тэлж, 4–8-р байр эзэлсэн таван баг тус бүр 200,000₮ хүртлээ. L’Équipe, Hi6, SEQUENCE, MFCC-DSU багууд тус бүр 21 оноотой барианд орсон бол BLACKJACK, Fire Breathers багууд 20 оноогоор тэнцэж, сүүлийн шагналт байрыг нэмэлт асуултаар шийдэв. Шинээр оролцсон SEQUENCE анхны дугаартаа contender болзол хангаж, шагнал хүртсэн нь мөн анхаарал татлаа.
Нэмэлт асуулт нь “Чарльз Осборн хамгийн удаан хугацаанд зогиссон дэлхийн дээд амжилтыг эзэмшдэг. Тэр хэр удаан зогиссон бэ?” байв. Fire Breathers “14 хоног”, BLACKJACK “33 жил” гэж хариулжээ. Зөв хариулт болох 68 жилд илүү ойртсон BLACKJACK наймдугаар байр эзэлж, Contenders-ийн боломж хангав.
V дугаарын шагналт багууд
Vertigo — 26 оноо · 1,222,000₮
Lacoste — 23 оноо · 733,200₮
Mrs Julia — 22 оноо · 488,800₮
Contenders — тус бүр 200,000₮
4-р байр: L’Équipe — 21 оноо
5-р байр: Hi6 — 21 оноо
6-р байр: SEQUENCE — 21 оноо
7-р байр: MFCC-DSU — 21 оноо
8-р байр: BLACKJACK — 20 оноо
Харин Lucky #9-ийн азтан Gen Quiz болж, дараа долоо хоногийн тэмцээнд үнэгүй оролцох ширээний эрх хүртлээ.
Таван дугаарын дараа Vertigo 136 оноогоор улирлын хүснэгтийг тэргүүлж, Hi6 болон L’Équipe тус бүр 130 оноотой удаалж байна. Өмнөх дугаарын дараа тэргүүн гурван багийг ганцхан оноо зааглаж байсан бол энэ удаа Vertigo давуу байдлаа зургаан оноо болгож нэмэгдүүлэв. Mrs Julia 122 оноотой дөрөвдүгээр байрт дэвшиж, Wikidebia 119, MFCC-DSU 116, АСА 114 оноотой тэдний араас нэхэж байна.
Анхны хошой аварга, Lacoste-ийн ахиц, АСА-гийн огцом уналт, шинэ багийн амжилт гээд V дугаар улирлын өрсөлдөөн ширүүн үргэлжилж байна.
VI дугаарт Vertigo тэргүүллээ хадгалах уу, эсвэл нэхэгчид зөрүүг ойртуулах уу?